食在泰國 - Bake 芝士撻

 

12月頭同老公去左泰國, 估唔到竟然係泰國遇上日本芝士撻, 但最估唔到既係同樣要排隊, 不過佢呢條隊都好快, 係一路排一路向前行個種.

 

一開始經過, 我沒有留意的, 係老公見到有人排隊, 所以留意左, 仲拉我過去睇, 我初時以為係蛋撻, 我仲同老公講, 蛋撻做咩唔返去香港食喎. 但因老公想食, 所以照排, 行到近counter, 先知原來係近期最hit 的芝士撻. 價錢比香港平少少. 由於人流多, 所以所有芝士撻都係新鮮, 熱辣辣. 我地2個人買左一個, 買完企埋一,二面食~~

 

呢個cheese tart 真的幾好味,  外皮同餅底都脆, 同埋入面原來不是流心, 係似布丁咁既質地, 芝士味應然淡, 如果一個人, 完成一整個, 會好流. 由於熱辣辣, 所以額外加分. 不過還是覺得香港的芝士蛋撻好味d.

化妝品 - Maybelline Fit Me Concealer

 

 

之前去左美加, 終於接觸到係youtube 界成日都俾人提前而香港又無 Maybelline Fit Me Concealer. 我都發現佢應該長期都唔齊貨, 我經過唔少的drug store or walmart 都唔會有晒咁多隻色, 或者得1-2隻. Walmart 因定價低, 更加係長期無貨, 而最搞笑既係, 佢地可以Fit Me 呢條line 成個櫃都吉左. 所有foundation, 粉餅, concealer 都係無晒~~~ 實在太有趣.  

 

Concealer 出名的地方係好多外國youtubber 都話佢可以比美NARS 既 Radiant Creamy Concealer , 因我本人無nars concealer, 所以唔可以作比較. (不過我平日都有睇開既makeupgeek, 就用過佢地做比較, 最後係Fit me win,  https://www.youtube.com/watch?v=H4evlhZ5vKw)

佢有6隻色, 不過我係我去既drug store就多數見到2-3隻, 加上唔係枝枝都有tester, 所以只係試到3隻色, 不過都應該係大路色.

 

咁分別係上中下既, #25, #20, #15

 

佢搽出來係水水地, 中度coverage. 一開始我會毫不吝嗇地cover 整個眼底, 等一等, 再用無名指印開個邊. 雖然佢質地不是太乾, 但可以係用之前加少少eye cream, 以防起乾紋.  

 

我本人買左#25, 因覺得#25 有少少橙色, 用來遮黑眼圈應該ok. 可惜我上左眼, 成日都時間一耐左就灰左, 應該係太深色, 所以可能#20會岩 d. 不過講真, 一枝under HKD100 的concealer 可以有咁既質地真的唔錯.

 

用過呢枝concealer 後會明白, 點解去walmart 佢可以成個櫃俾人掃晒. 以咁既價錢, 有咁既質數, 實在好難得, 佢令我都好想試埋 foundation n 粉餅. 大家去開外國, 都可以買黎試下!!! 真心推!

 

食在屯門 - Outback lunch

 

星期六日, 我會想慢活一下, 就會去d 可以任坐的地方, outback 都會係我的選擇之一.

佢的lunch 係由12 - 4, 價錢由HK76 - HK106, 不過要加一.

lunch set 有湯, 沙律, 黑糖餐包, 主菜同埋飲品.

飲品同黑糖餐包係可以任refill, 我覺得係極度, 極度抵.

佢lunch有9個choices, 但我多數會叫burger (不過咁個日的lunch 就會不停咁食包啦 HAHAHA)

其實佢味道一般, 但硬件搭夠, 咁一百蚊到, 有齊咁多野, 仲有個地方俾你舒舒服服咁坐下, 同朋友傾下計, 唔會俾人趕走, 呢個價錢己經足夠有餘.

食在屯門 - 大門拉麵

 

屯門市中心成日都有新店鋪進注, 几個月就有鋪轉一轉, 今期又有几間新食店, 大門拉麵係其中一間.

前身係白熊咖哩, 店鋪間格都同以前一樣, 一入去就見到廚房, 望到師父煮麵. 麵分成3類, 湯麵, 沾麵同埋油麵. 佢餐牌油麵係自家的, 都有特別介紹食法.

 

 

枱上己放有大路的調味料以及水  (最鍾意係咁, 唔洗下下都叫人)

 

 

今次我和男友叫了叉燒炒飯及素菜拉麵

 

 

其實我己經食過好几次, 只係油麵未食過, 因天氣凍, 實在一定要食熱湯

 

總括:

大門拉麵 $48 - 好味, 湯夠熱, 麵又彈, 仲有2塊叉燒同埋少少菜

鬼門沾麵 $58 - 夏天食應該一流, 可惜現在是冬天, 真係食完個人都唔熱. 但辣辣地都几好味呀

大門菜湯麵 $52 - 其實只不過係大門拉麵, 無左叉燒同埋多 d 菜 (咁我下次都係食大門拉麵算)

鬼門拉麵 $55 - 唔好講笑, 真係好辣, 辣到我要加湯 (平日食譚仔都食三小辣啦), 食得辣既人, 絕對可以一試!!

叉燒炒飯 $28 - 飯是日本米, 但無咩味, 又無咩叉燒

 忌廉薯餅 $12 - 無咩特別, 似係買回來的

味旦 $12 - 流心, 都係你心目中的旦咁既樣, 但係凍的

 

 開左呢間大門拉麵, 其實好開心, 因屯門市中心終於有返 d 平野食, 而唔係一路越開越貴. 咁大家可以多個選擇. 以佢的價錢, 其實有時連椰林閣都會貴過佢. 同埋味道不差.

主婦生活 - 南瓜香菇素菜炊飯 (失敗版)

 

之前流行整炊飯, 我又八卦試下, 但自己唔小心唔記得落調味, 所以失敗左. 雖然男友話味道OK, 但我總覺得很淡...

 

材料: (2 人份量)

甘荀 1 條

薯仔 1 個

南瓜 1/4 個

洋蔥 1 個

椰菜 1/4 個

小香菇 1 包

米1 杯

 

1. 首先把所有材料, 除了小香菇以外都切成細粒

2. 把洋蔥炒成金黃色

3. 把椰菜放在洋蔥之上

4. 再將所有食材都放進去

5. 再放一杯水  (水跟米是一比一的)

6. 再煲20分鍾, 搞伴便可

 

其實放水時, 也要放調味的, 但因我忘了, 所以你看到飯也很白.

這個飯也可以用電飯煲的, 那看火也不用. 非常簡單.

 

 

 

食在屯門 - 三哥又加價

昨天一去三哥度食野, 就發現佢又靜靜地加左價..

所有野都加左1蚊 =口=

皮旦更加左2蚊...

看來都要搵個第二個飯堂

 

 

由於太耐無食, 所以好豪咁一個人都叫左個皮旦

平日我次次都會叫酸菜, 三哥酸菜真的一絕.

但自從有左蕃茄湯底, 就不用再叫, 可留返錢叫其他餸

 

 

地方 - 大澳遊

之前同朋友行完東澳古道, 就順手遊大澳. 上一次黎去大澳己經係好多年前的年, 個時同老公剛拍拖, 所以成日四圍遊. 不過當年的大澳星期六日都己經好多人.

 

家下大澳都仲係會四圍見到買咸魚或者係曬乾野

 

 

不過除左呢 D, 仲多左好多特色小店, 賣下民族特色野

 

 

不過個日最吸引我係呢間貓貓CAFE, 佢入面有得坐, 出面賣小精品. 仲有2隻留浪貓係出面行來行去, 不過佢地都NICE, 可以俾人摸, 唔會WO人 >V<

 

化妝品 - Giorgio Armani 2015 X'mas Palette Luxe Is More

又到一年一度的出血聖誔, 市面上咁多個X'mas set 總會有一個令你心動. 座擁9萬樣化妝品既我, 第一件失守既就係Giorgio Armani Luxe Is More palette, 第一次見到佢係BE IG, 跟住第二日己收到 GA 寄來的咭仔, 第三日一出就9秒9衝去買. 買完仲要望一輪都唔捨得用.. 真係好靚呀(可能我呢 d 化妝品痴先會咁 T.T)

  

 

佢有10色眼影, 大路到唔大路, 講真呢 d 色我全部都有, 但放左係呢個palette 入面感覺總不同 (名牌效應~~ 不過質地係好滑同埋出色的!!!)

 

 

上層:

上面4格淺色, 可以返工 OR 做日常妝

中間2 格就可以做眼線

下面4格比較深少少, 咁可以加深做晚妝都OK GA

 

下層:

2個concealer/foundation/contour

同埋一個碎粉

 

咁個袋仲會跟2個我應該呢世都唔會用的海棉頭化妝掃 (一黎到海棉頭化妝掃就真係覺得... 點解唔用毛, 人造毛都好呀, 感覺無咁cheap)

來到大家最想睇既試色圖啦~~

 

試係手 (日光), 上面係上排4色, 下面就係其他6色

 

 

 

怕大家睇得唔清楚, 再試係紙, 不過我左右反轉左....大家自己對返, 同埋有個銀白shimmer 實在太難影, 所以係白紙之下, 變左無色, 但其實閃粉好出的.

 

白燈光:

日光: 

 

OVERALL, 其實呢個PALETTE都几好, 顏色好實用, 用上眼應該係低調風, 一貫貴牌的風格, 會係用左好似無用, 但又氣息好加輪廓深少少個 D. 除左眼影, 佢下層既CONCEALER 同埋粉其實都值得讚, 我用淺個格CONCEALER 做眼底, 顏色岩同埋無現眼紋, 我覺得好好, (不過COUNTER 又好似唔覺佢有呢個產品, 或者只係我唔知, HEHE)

不過一格好, 咁另一格就深色左, 唔係好知可以用黎做咩, 如CONTOUR, 我就覺得質地太CREAM, 唔係咁好推.

去旅行, 我都會帶既, 因一盒有咁多野, 唔會有太多散修修既野係化妝袋度LOOK 來LOOK 去, 咁我只要帶胭脂同埋一SET 掃就OK~

不過HKD830值唔值就見仁見智, 但佢滿足到我既.

**申利，產品是自購的

食在尖咀 - 魚仔燒@TST Sogo (鯛魚燒)

 

之前行過TST SOGO 去地庫行下, 見到呢間魚仔燒, 自從由日本回來後, 都無食過呢 d 野啦, 見到無人就立即買黎食.

 

佢好似有3隻味, 吉士, 紅豆同埋朱固力. 我就買左原始既紅豆.

唔好講笑, 都真係几好味.

首先, 上手是熱的 (呢點非常重要)

二, 外層是酥皮, 好脆

三, 內容豐富, 入面全是滿滿的紅豆, 不欺場

 

大家行sogo 倦時, 可食一食呢個抖一抖~

 

化妝品 - Giorgio Armani Lip Lacquer #603

 
早前Helloween 我終於有藉口可以買枝今年大熱, 但又極無用的深紫色lip gloss

 

 

呢枝GA lip lacquer 真的好正. 一來紫夠深同埋其實佢好long last.

 

Left to Right

咁係放耐左, 佢自己會深色 d, 更出色

 

呢個係上咀圖, 上面係屋內光, 下面係日光

係日光之下, 其實係好顯白

 

不過其實我最愛係上左咀, 等一陣再搽走

因佢好long last, 其實要完全搽走 d 色好難, 所以就算我搽左個咀, 其實佢仲有 d 紅色留係個咀度, 咁個色就會紅得黎好自然, 我勁Like

(我估都係唯一一個方法令我係不在helloween 日子都係用到呢枝lip gloss 既方法)

 

食在大澳 - 海韻素菜食館

同朋友們行完山, 朋友就介紹我地去海韻素食菜館食飯. 佢話好出名的, 但我心入面覺得好古怪, 明明叫素菜館, 又食肉呀喎. 由大澳碼頭都要行一大段路先去到個面條村, 其實以行完一個4個鍾既山, 再行一條10-15分鍾既大直路, 都几攞命.

 

咁我地一行4人叫左5個送.

1. 鹽焗雞 (最好訂)

2. 紅燒豆腐 (出名豆腐食品)

3. 西檸腐皮

4. 雜菜煲

5. 椒鹽白飯魚

 

其實成餐都几好味. 不過鹽焗雞真的超正! 又滑又夠味, 唔怪得之朋友話要訂. (必食)

紅燒豆腐係滑的, 但應該有少少失手, 因食時有少少煨味, 所以我無食個面, 只係食左入面舊豆腐算, 同埋佢個汁唔係好傑, 好岩我心水~~~ (必食豆腐, 但佢最少有6個煮法, 大家自己選啦)

雜菜煲, 堅係雜菜, 入面至少有3隻菜, 有白菜, 菜芯, 油麥菜, 真係將佢所有的唔同菜類都放晒入去~~~ HAHAHA~ (太搞笑)

不過因食唔晒, 所以西檸腐皮同白飯魚都係打包走. 佢地唔係唔好食, 只不過係遲左上, 我地食晒之前個 D , 仲要每人趴左碗飯, 所以食唔落啦.

 

如果有下次, 我會一早ORDER定佢個腰果露, 餐廳話今日做唔到俾我地 T.T

 

 

食在屯門 - 吉之島頹飯 (咖喱豬扒飯)

 

 今日行吉之島熟食區, 見到15蚊有個飯, 諗都唔諗立即買黎試下先. 摸上手仲要熱熱地, 正!

 

大佬15蚊, 家下去季季紅買個單拼都唔得啦!!! 搵到平野真係令心情大好. 

 

其實個飯不太大, 但一個女仔都ok ga, 咖喱汁係可以夠你撈成個飯, 不過得個飯係熱, 豬扒凍左.

雖然豬扒是凍, 但只要叮叮佢, 都可以好ok ar!

 

呢個都係一個人飯的新發現!

 

飲食 - Urban Cafe Commune

Urban Café Commune是新世紀翻新後, 變成MOKO後, 我最常去的餐廳.

原因係價錢正常, 但份量大, 雖然用膳時間只得個半鍾, 但都仍然抵食. 加上我次次都只係食lunch. 每次食完都會見到後面有一條小小的人龍仔.

　

全日都係得一個menu, HKD100+, 但己經包左有湯, 有野飲. 佢地 d 野食名改得好搞笑, 中英文都應該係得香港人睇得明.

咁我今次同朋友叫左鵝肝牛肉漢堡, 辣虎蝦意粉同埋龍蝦意大利飯, 3樣都好唔錯.

鵝肝牛肉漢堡, 鵝肝軟, 夾埋火箭菜食, 個味好夾. 不過係難切 d. 同埋我第一下就食呢個, 好快就好漏. 其他野變左食得唔多.

辣虎蝦意粉, 同menu上寫既一樣, 蝦真係得2隻. (點解俾多 d 都唔得!), 佢個味就一般, 同四圍食到既味一樣, 無咩特別. 不過食完漏漢堡就可以刺激下個味覺.

龍蝦意大利飯, 個飯好軟, 又creamy. 好味的.

 

行山 - 東涌到大澳

由於報左盲俠行, 所以就同朋友們一齊操一操先!

 

今次的路線係由東涌行到大澳, 全程3-4個鍾到, 中間大約一個鍾到就休息點.

起點由東涌mtr 出發, 經消防局, 就開始行啦~ 沿住條路行一個小時就會有可休息的涼亭, 呢段多數係望機場同埋未完工的港珠澳大橋. 呢段都係最relax~

 

 
之後個段就會有上落斜, 但都係石屎路. 同埋中間會經過好多村, 好彩沿路無狗. (感謝主)

 

咁一個鍾之後就會到沙螺灣同深屈村, 深屈村的亞婆蠔餅都係我地完成上落斜的最大動力. 到步後, 原來咸檸7都不能睇少, 好好飲呀. 大家一定要飲呀 !!!

過左沙螺灣同深屈村, 就係最後一段, 都係最攞命的山路. 咁佢有上上落落的石路, 同埋俾好多草圍住的山路, 仲要晒到正一正. 好彩都係個几鍾姐. 再長 d 我都唔知點算.
我覺得石路最難行, 因成日都怕自己會look 落去, 所以行得勁慢, 好彩後來朋友執左條木俾我, 咁有左條木就易平衡好多, 行都行得快左 !!!

不過最後呢一段個景都係最靚既, 呢個山頭似唔似外個移民廣告呢~
 

咁一落就會連住大澳排屋的邊邊, 所以不怕迷路.

衫 - 香工街邊買衫記

以前係香工入面買衫就買得多，不過出面街邊就真的第一次，哈哈

本來個日我約左人係長沙灣食飯，咁約左係mtr 口等，我見一堆人圍住個亞姐，我咪行埋去八下，跟住就失手了。

 

一圍入去就見到有條連身裙我好like, 可惜我著唔落, 不過摸上手, 質地都好, 加上問左亞姐, 都係百頭, 真的好ok~ 所以就埋頭係咁尋寶.

我由我係最早一個人到，變左所有人到晒，而有人走先去攞位，我都仲睇緊，前前後後搞左大半個鍾。

 

最後我買左4件衫,加埋晒都係400蚊，100蚊件，都好抵。如果你得閒, 其實亞姐可以俾你試, 同埋佢話如返到家唔岩, 可以返去換1次, 佢長期星期二, 五都係度~ 佢 d 款 以由好返工去到好師奶都有, 大家經過可去睇下~

飲食 - 膳德福素食 (旺角)

有朋友是吃素的，所以我們的gathering 有時會在素菜館。為左方便, 所以今次係旺角食. 唔搵都唔知原來先達小巴站旁邊有一間.

膳德福素食是屬於舊式的素菜館，大部份菜式都係由面根唔同的型態演繹，而且多數濃味"軒"汁，所以都比較油膩。

吸引我們到來的其實是素壽司，我們點了卷物，個感覺同食平日出面的卷無咩分別。 （哈哈）

其他野都不過不失, 印象最深的係腰果露, 因出面比較少有.

飲食 - 新斗記

同男友偷得浮生半日閒咁去飲茶，本身想去新開酒樓試下，點知去到，新酒樓已俾人重重包圍。所以就去新斗記，自從多左間酒樓之後，新斗記都變得不再旺場，所以一去到就有位。

得2個人，叫得唔多，只係叫左4 樣。

1. 雪山叉燒包

2. 布拉格腸粉

3. 蝦餃拼盤

4. 魚頭雲

4 樣野，係拼盤同叉燒包差左少少，其他2樣都好好味。咁講左唔岩我口味的先。

拼盤係蝦餃，奶皇餃同埋粉果。我覺得3 樣的皮都好厚，由其係奶皇餃，雖然佢個樣好可愛，我會寧願食個奶皇包。同埋可能我有腸粉就更比下去。

雪山叉燒包，不合我口味，是因太油了。拿完上手，全是油。

魚頭雲，有4-5件，大約2個魚頭，佢連埋村弓一齊蒸，無腥味也沒有。我平常不食魚的，但不知為何很喜歡食這個。

布拉格白腸粉，呢個真的好食到不得了，很滑，而且有米香，好味到男友想叫多一碟

地方 - 創業市集@D2

　

 

上星期六同朋友去左 D2 , 本來打算行下街, 但發現原來有創業市集, 就入去行下. 

其實入面都几大, 都有成30-40 個單位, 如仔細每一個單位睇, 可以消磨1-2個鍾

 

 

佢地既貨品多數係人手造既手作仔~ 都好有創意呀

 

 

咁我都買左3件手作仔同埋超抵!!!

介子一隻 HK$25, 耳環 HK$38

直逼TB!

 

化妝品 - bareMinerals Blemish Remedy

 bareMinerals 礦物粉係出左好多年既產品, 唔少人都用過, 我都係香港仲有sephora 既時候買過. 個時係一set 既, 一盒粉, 一個胭脂, 2個眼影, 包埋3枝掃, 仲跟住一個有鏡既大盒. 係外國網站家下都好似仲有呢個set, 其實係好抵呀.

 

不過由於佢係粉, 所以用時真係好唔方便, 好多時搞到四圍都係粉, 一係就拿唔到, 一係倒到四圍都係, 加上其實唔係咁好用, 無咩coverage, 所以用几用就無再用. 亦一路都無再買過呢個品牌既野.

 

直到我見到呢個blemish remedy, 先有再買的念頭. 可見其實packaging 都好重要. (哈哈)

 

 

 咁你都見到佢有個網几好, 至少只要插枝掃入去就拿到粉, 不過有時都會拿多. 如果你怕插入去會拿到太多, 你可以打斜個掃係個網上面look, 咁個份量會少好多, 不過都要用多 d 時間啦.

咁上面既方法都係拿完粉, 就用個掃係面上打圈咁上, look 下look 下咁.

 

 

以上係coverage 既圖

第一張, 素面

第二張, 上左一層

第三張, 上左三層

 

 

我本身塊面好紅既, 所以我多數會上三層, 同埋我覺得好似上完等一等, 佢就會再變一變色, 或者叫做matt 一點, 所以我其實都几鍾意個finishing. 之後加唔加碎粉都得, 不過我就唔加多. 上之前都係用 d 保濕既面霜就ok~ 當然啦, 黑眼圈同埋色斑, 都係要另外用concealer, 不過單上, 就己經夠我用, 因我只為均衡膚色.

 

 

講左咁多好, 其實佢都有缺點既, 就係佢有好大陣茶榭油味. 雖然佢係成份有寫, 其實都係佢既其中一個重點. 但第一下用時, 真係想暈低, 同埋我次次用都會打几個噴次. 同埋佢係咪真係有消炎功效, 就不得而知.

 

 

不得不提, 佢呢枝掃係几好用. 毛比輕短而且多, 我估其實用黎上其他牌子的粉餅都几好

主婦生活 - 蕃茄冬菇豆腐飯

其實蕃茄飯hit 左好耐，但唔太有飯氣的我，一直都無去試。不過前几日係街市左買鮮冬菇，一路都未諗到點煮，一直勁係icook 度睇，所以就整左呢個。

材料好簡單

1。米 隨意

2。 蕃茄一個

3。冬菇 隨意

4。豆腐半件

煮法其實係所有野洗淨，再係蕃茄底打個十字，加各樣你鍾意既香料同少少油，煮大約15分鐘，熄火，再焗5分鐘，所有野搞埋一齊食得。

雖然以上係咁，但我又出現懶醒，頭頭以為我有咁多出水既野，米又少，因我的米根本cover 唔到煲底，我咪唔落水，煮既時候發現，原來蕃茄係無咁快出水，所以快快加水。到尾聲，見d 米都仲係硬，先記起，我係用日本米，更吸水。所以係咁加水，好彩救得返，仲成功。 hehe

太美好

電影 - 寄生獸 (有劇情，慎入)

前几日同朋友去左睇，係無諗過咁血腥之下睇，大家都有少少驚，不過都係good movie, 最唔好係有2集，要等羅😆

其實成套戲都係帶住走，好smooth, 無悶場。雖然佢係漫畫改編，但因我無睇過 (不是我的年代)，所以仍然好受落。其實類似的idea 西片都好似有拍過，但日本仔果然係日本仔，真的拍得好好，前後 (至少呢集係) 所有野交待得好清楚，同埋主角的轉變。唔會一味得個血肉分離，而無左劇情。因同右手的結合，男主角心態的轉變，都捉得合到好處。

另一讚位，真係佢既CG, 做得好好，個怪獸做得又真!!

好喜歡佢話怪獸食人，等於人食動物。同埋想令食人合法化，而去觸及政治，實在太正!!!!

絕對值得入戲院睇!!!

Sonia Rykiel cleaning oil

我好少未用完d 野就出文，但sonia rykiel 呢枝cleaning oil 實在太正。

首先樣靚， 雖然呢個point好個人, 但我都好鍾意佢地肥肥的design.

第二，入正題，我愛佢，係因佢用完唔乾。我有時落妝同沖涼分開，所以會落完妝唔用skin care, 係個個時候就好feel 到枝落妝油dry 唔 dry. 咁我一用完個刻會有一個潤的感覺，再坐多，係會dry, 但未至於乾到拉下拉下咁。

第三，佢好香!!!!

不過sonia rykiel 香港已經無得買，所以大家想買，就要去日本啦。

食 - 醬家

星期六同老公出左市區，本來想去油麻地食素，點知被人包左場。四圍行由就見到呢間門口超日式的拉麵店。

看一看menu, 成間鋪得5個面同一個小食，食到咁尊，咁真的要試下。其實佢係sell 蕃茄湯底，但有5樣唔同既餸，真係背都背得出。

1。蕃茄蝦

2。蕃茄蜆

3。蕃茄芝士

4。蕃茄雞

5。蕃茄素

小食係芝士磨菇。

因老公食唔到海鮮，所以點了芝士同雞及小食。小食好好食，又夠熱，芝士同磨菇係perfect match. 真係食多几粒都無問題。

主菜到，見到碗面咁大碗，初頭真係諗住佢只係碗大，點知份量都唔少。值得一提，蕃茄芝士，真係放左塊芝士係蕃茄上面。主打的蕃茄湯，我覺得不太特別，但佢唔係星座個d 湯底味，佢係似我地在家下落3到4個蕃茄整湯個d 味。

不過我覺得整體几好，同埋佢裝修真的非常日式，值得讚!!!

叫左3樣野，埋單200，算係咁

情報 - Lola lip stick@Watson

因Watson 係唔俾影相，所以大家請原諒張相有頭無尾。

今日神來之筆去屈人寺行下，點知俾我見到呢個架，見到目定口呆。Lola makeup 係最初黎香港時，都仲係facesss 有counter, d 野價錢都仲中上，不過几年後，就做唔住，離開hk.

Lip stick 係皇牌item, 當年仲好威，lip stick 有刻名服務。可惜再返黎已down 晒grade, 佢家下做特價，所有lip stick 劃一hkd 99 枝。其實hkd 99 枝，價錢真係同開架睇齊。

成個架係度俾你任試，所以好多sample 俾人遊輪到呢。如大家想平價買貴野，可去搵一搵，應該有正野。